मुंबई : बँक ऑफ बडोदा, विजया बँक व देना बँक यांचे एक एप्रिल २०१९पासून विलीनीकरण झाले. वाढलेल्या ग्राहकसंख्येमुळे ग्राहकांना जास्तीत जास्त सोयीसुविधा मिळाव्यात या उद्देशाने बँकेने १ जून २०१९ पासून बचत व चालू खात्यांच्या बाबतीत सहा महत्त्वाच्या बँकिंग सेवांच्या इंटरऑपरेबिलिटीची सुरुवात करण्याचा निर्णय घेतला आहे.
या सहा सुविधांमध्ये ५० हजार रुपयांपेक्षा कमी रोख रकमेचा भरणा, ५० हजार रुपयांपेक्षा कमी रोख रक्कम काढणे, एक लाख रुपयांपर्यंतच्या रकमेचे त्वरित आंतर-शाखा ट्रान्सफर, संपूर्ण विस्तारित नेटवर्कमध्ये सर्व शाखांमध्ये धनादेशाच्या स्टॉप पेमेंट' सूचनेचे नोटिंग, खात्यामध्ये केल्या गेलेल्या शेवटच्या दहा व्यवहारांची खात्री करून घेणे आणि खात्यामधील शिल्लक रक्कम जाणून घेणे यांचा समावेश आहे.
आता ग्राहकांना २४ हजारपेक्षा जास्त ठिकाणी सेवांच्या उपलब्धतेमुळे एकत्रित नेटवर्कमार्फत अधिक विशाल भौगोलिक विस्ताराचे लाभ मिळत आहेत. ग्राहकांना अधिक सुविधाजनक ठरत असलेल्या विस्तारित नेटवर्कमध्ये साडेनऊ हजारांपेक्षा जास्त शाखा, १३ हजार ४०० पेक्षा जास्त एटीएम्स व बाराशेपेक्षा जास्त ई-लॉबीजचा समावेश आहे.
भविष्यात सेवांच्या इंटरऑपरेबिलिटीच्या कक्षा वाढविल्या जाव्यात अशी बँकेची योजना आहे. इंटरऑपरेबिलिटी म्हणजे याआधी ग्राहकांचे खाते बँक ऑफ बडोदा किंवा विजया बँक किंवा देना बँक यापैकी कोणत्याही बँकेत असेल, तरी आता ते या सेवांचा लाभ कोणत्याही शाखेमध्ये घेऊ शकतील. याआधी विजया बँक आणि देना बँक असलेल्या व आता बँक ऑफ बडोदामध्ये विलीन केलेल्या सर्व शाखांमध्ये सेवांची इंटरऑपरेबिलिटी अजूनपर्यंत सुरू होती तशीच कायम राहील.